Mir Altgardischde sin e glatti Bandi vo männlige Fasnächtler, wo’s e weeneli gmietliger nämme. Mer leen ys an de drey scheenschde Dääg und Nächt zytlig nit stresse, sondern gniesse d Frau Fasnacht und leen ys vo iire verweene. Au hän mer bi de Marschhält no Blatz zem zämmehogge. Mer sin stolz uff unsere AGB-Stamm und nadyrlig uff unseri Jungi Garde, d’Setzlig. Mer schetzes aber au, ass mer nimme jedes Joor e neye Marsch mien ynedrugge. Mer leen ys aifach e bitz mee Zyt, wenn mer musikalisch ebbis Neys aapagge. Näbe em Drummle und Pfyffe sin d’Kameradschaft und Gselligkait ganz wichtigi Faggtore. Eso macht’s au Spass, Fasnacht z’mache.